મારી  બહેના ...



પ્યારનો પમરાટ ઘૂઘવતો સ્નેહનો સાગર,
મુખડું જોતા જ થાય સંતોષ એવી મીઠા પાણીની ગાગર..

રેશમી તાંતણો હદયના હેતથી બાંધી માંગતી અખંડ રક્ષા,
સલામતીની ફોજ કરતા આપતી મૂંગા મોઢે સુરક્ષા...

નાનકડી એ પરી લાગતી નિર્દોષ ભગવાનની મુરત,
જોઇને હૈયામાં હરખ ઉમટે એવી વ્હાલની પ્યારી સૂરત...

ભઈલાને કાંઈ થાય તો કરતી ઉપાયની શોધ,
ના મેળ આવે તો પ્રભુજી પર કરે ક્રોધ....

રીસે ચડીને, મોં ફુલાવી, એ આંખોથી કતરાતી,
ભઇલો જરા પ્રેમથી મનાવે તો એ મુખેથી મલકાતી...

ચમકતું મુખડું એનું અને હોઠ બોતેર ગાઉની હસી,
સ્મરણ થાય ઈશ્વરનું ત્યાં તો મારી બેના નજરમાં વસી....